ABURUKARIA

    SERENGETI KOMIKIA OSORIK DAGOENEKO!   Azken kapitulua izan behar zuena hiru zatitan osatu dut, 2021 urtean hasi nuen lan honi amaiera emateko. Komikien Aurkibidea orrian aukeratu dezakezu irakurri nahi duzun atala. Zuen gustokoa izan dadila!

2025-06-07

    Serengeti komikiaren 7. kapitulua osorik. Beste 3 hilabete behar izan ditut. Hona hemen.
   Horren gain, euskarazko komikien aurkibide-orrian, Serengeti komikiko atalean, honen aurkibidea gehitu dut, kapituluz-kapitulu, komikiak dagoeneko 114 irudi baititu. Hurrengo kapitulua azkena izango da.

2025-03-14

    Serengeti komikiaren 6. atala osorik beste 3 hilabeteren buruan. Hona hemen

2024-12-28

    Serengeti komikiaren 5. atala osorik 3 hilabeteren buruan. Argitalpen epeak laburtuz, baina marrazki gutxiagorekin. Hona hemen

2024-09-03

    Ilustrazioa estekako argazkien atalean serie berri bati hasiera eman diot, Euskal Herriaren Ehundurak izenburupean, Ternuako Ehundurak seriearen ildotik. Argazkiak ikusteko hemen klikatu.

2024-06-22

    Serengeti komikiaren 4. atala osorik dagoeneko. 6 hilabete ondoren. 21 marrazki guztira.Hona hemen

2024-05-26

    Adar berria gehitu diot Ilustrazioen atalari. Marrazkiei eta infografiei emandakoen gain, argazkia helburua duen beste bat edukiko duzue aurrerantzean. Hasteko Ternuako bidaian jasotako "ehundurak" igo ditut.

2023-11-29

    Serengeti komikiaren 3. atalaren azken marrazkia konplexua bazen, 4. atalean konplexutasuna hareagotu egin da. Hiru irudi igo ditut dagoeneko, azkena gaur bertan, orain arte zailena. Hona hemen

2023-11-17

    Aurreko sarreratik 9 hilabete pasa dira, agindu nizuen Serengeti komikiaren jarraipena, bigarren zatia, lantzeko behar izan dudan denbora. Gehiegi, baina aukeratutako prozedurak lana eskatzen dit. Dena dela, badago, eta ez da azken zatia izango. Hona hemen "Serengeti" hasieratik.

2022-09-29

    Aurreko sarreran aipatutako mikrokomikia garatu egin da. Historia berez hazi da, gerta zitezkeen hainbat pasadizo etorri zaizkit gogora. Gaur igotzen dudana kontakizunaren lehendabiziko atala da, edo bigarrena; baina edozein kasutan jarraipena izango du. Izenburua "Serengeti" izango da, masai hizkuntzan "amaierarik gabeko lautadak" esan nahi duena. Mikrokomikian erabilitako teknika erabiltzen jarraitu dut.

2021-12-19

    Hiru marrazki berri webera. Ilustrazioen 11 orrira. Bi errealistak dira, argazki eta marrazkia erabiliz osatuak. Azkena mikrokomikia da eta hauen orrian jarri dut ere. Antzinako Kotxeen erakusketa batean ateratako argazkiekin zeozer egitea pentsatu nuen eta eszena bereziak muntatzea otu zitzaidan. Azeriaren eszena nik egindako argazkiez osatu dut. Azeria marraztuta dago, oinarri nireak ez diren bi argazki erabilita. Afrikakoa hainbat argazkien batura da, marrazki bidez egokituak. Kotxeko argazkia da nik egindako bakarra. Nireak ez diren argazkien egiletza ez zen ageri. Ez dago bere horretan utzitako argazkirik.

2021-05-09

    Lau marrazki berri webera. Ilustrazioen 10 eta 11 orrietan. 11 orrikoak Krita programa librea erabiliz eginak dira. Azkena Photoshopeko ukitu batzuk ditu.

2021-03-21

    Maiatzean gazteleraz bakarrik den komikia argitaratu ondoren, gertatzen den lekua eta beste zirkunztantzia batzuk direla eta hala behar zuela erabaki nuelako, orain literatura lantxo bat eskegi dut, hau euskaraz eta gazteleraz, bietan batera sortu baita. BITEZ INFINITUAK BELAK du izena..

2020-07-15

    Bost hilabete ondoren lantzen ari nintzena igo dut web honetara: ATARIKOA deitu dudan komikia, web formatura egokitutakoa historioa, zerbait luzeagoaren hasiera izan daitekena.

2019-10-25

    Mastodon.eus sarean aurreratutako zenbait lan igo ditut gaur web honetara. Mota guztietako marrazki surrealista koloredunak, koloreak4 eta koloreak5 orrietan

2019-05-19

    Azken berrien ondoren facebook uztea erabaki dut. Aurrera Mastodon.eus sarean aurkituko duzue Komikira profila.
   Horren gain orri honetan aldaketak egin ditut. Aldatu dut marrazkietara ailegatzeko modua. Ikus ezazue marrazki eta margolanen orri berriak. Irudi gehiago sartu dut.

2018-12-16

   Ohartuko zenutenez Hutsa komikiaren argitaralpena geldirik dago. Arazoa, nireganako desadostasun kreatiboak. Historia bere narrazio hari nagusitik desbideratzen, edo gutxienez adigabetzen, ari zen. Beraz, hausnartze aldia hartu nuen. Margo solteak egiten hasi nintzen hutsunea betetzeko eta honekin liatu naiz azken aldian.

2018-04-04

   Ez da kontakizuna zeure ustetatik libratzen, dakizunaren menpe da, eta ez dakizunaren ments. Muga asko ditu kontakizunak, are gehiago, eskatzen dizuten neurri eta formatuan egina bada, argitaratuko dizutelakoan, ahalegina amaituta hala izango ez dela esango badizute ere.
   Horrela sortu zen Bizitza Behar komikia, Habeko Mik aldizkarian argitaratzeko. Tamalez gaia arriskutsuegia iruditu zitzaien aldizkaria ateratzen zuen Eusko Jaurlaritzako HABE alfabetatze erakundearen arduradunei, ez zuten onartu eta ez zidaten komiki gehiago eskatu. Komiki honen aurretik nik egindako beste bat aukeratua zen aldizkariko “0” zenbakian sartzeko, baina zoritxarrez, zenbaki hura ez zen inoiz kioskoetara iritsi, erakundearen barnean banatu zen soilik. Bi komikiek indarkeria erabiltzearen kontrakoak ziren, baina publikatu zen hartan ez zen gure “gatazka” zoritxarrekoa agertzen.
    Behin Batean? komikia jatorrian formatu bertikalean egina zegoen. Hasi berria zen Ehun Kilo aldizkaria horizontalean maketatua zegoenez, honen eragileetako batek formatua aldatzea eskatu zidan argitaratu ahal izateko, eta hala egin nuen. Ez zen atera. Kasu honetan ez komikiaren edukiagatik, aldizkariak pairatu zuen finantziazio etenagatik baizik. Bi zenbaki eta bertan behera geratu zen. Eragileak kontatu zidanez aldizkaria ateratzeko dirua beste eragileetako baten kontu korrontean agertu zen ustekabean, eta horretan inbertitu ostean, kutxak diru sarrera akatsa izana zela esan eta dirua itzultzera behartu zuen. Game over!

   Azken aldian arreta handiz jarraitzen ari naiz Le cycle de Cyann liburu-sorta, François Bourgeon eta Claude Lacroixena. Aldi luzea azken hau, lehenengo liburua 1993an argitaratu baitzen. Ez dut gogoan noiz erosi nuen hura, baina geroztik hurrengo liburuaren aiduru egon naiz beti, Cyannen bizipen eta abenturen jarraipena ezagutzeko irrikaz. Sei liburuk osatzen dute sorta: La sOurce et la sOnde (1993), Six saisons sur ilO (1997), Aïeïa d'Aldaal (2005), Les Couleurs de Marcade (2007), Les Couloirs de l'Entretemps (2012) eta 2014ko irailean argitaratutako Les aubes douces d'Aldalarann zikloa ixten duena.
   Lehen liburua hipnotikoa da, ez dakit zenbat aldiz irakurri dudan. Egileek mundu bat asmatzen dute, geologia, biologia eta gizartea, guztiz originala. Kontakizunak aurrera egiten du irakurlea eramanez, baina atzean, marrazkietan, mundu osoa agertzen zaigu, azken xehetasuneraino definitua, saihestu ezineko berrikuspenetan idoro dezagun.
   Ez da mundu bakarra, liburu bakoitzean mundu berri bat marrazten zaigu, berezia eta betea.